Morto asasinado e outros contos,o

Entre 1998 e 2012, María do Carme Kruckenberg publicou periodicamente, en edición non venal e co propósito de servir de agasallo ás amizades, un total de quince relatos breves acompañados de ilustracións de Eva Lloréns, Mercedes Lence, Gonzalo Suárez, Antón Goyanes e da propia autora. Eses relatos, xunto con outros sete publicados en 1999, reúnense neste libro. A experiencia vital da autora é a gran protagonista e o nexo destas pezas literarias nas que a sensibilidade da poeta, as súas vivencias e o pouso da memoria configuran un tecido feito de retallos, historias e impresións persoais sobre a vida e a xente. Unha ollada literaria que é o envés, tamén verdadeiro, da aventura irrepetible da poeta.