Vidas senlleiras

A parroquia de Rozas déitase ás beiras do río Anllo no verdadeiro corazón da terra Cha, onde os carballos son aínda máis fermosos ca en ningún outro lugar da terra, especialmente na primavera, cando empezan a follecer. O Anllo, que polas terras de Abadín é aínda un río de curso decidido e semellante dos outros, ó entrar en Goá faise repousado e dubidoso, tanto que no preciso límite entre esta parroquia e a de Moncelos divídese en dous, e o brazo menor colle o nome de Guisande para ir facer a famosa lagoa de Valverde, onde disque xace asolagada unha cidade con lousados de ouro, verdes polo tempo e o lidro das augas.